Isaiah 61
Umnyaka Womusa KaThixo
1Umoya kaThixo Wobukhosi uphezu kwami,ngoba uThixo ungigcobile
ukuba ngitshumayele izindaba ezinhle kwabampofu.
Ungithumile ukuba ngibophe inhliziyo ezidabukileyo,
ngimemezele ukukhululwa kwabathunjiweyo,
lokukhululwa kwezibotshwa emnyameni,
2lokumemezela umnyaka womusa kaThixo,
losuku lokuphindisela kukaNkulunkulu wethu;
ukududuza abalilayo,
3lokunakekela labo abadabukileyo eZiyoni,
ukubapha umqhele wobuhle
esikhundleni somlotha,
amafutha okujabula
esikhundleni sokulila,
lengubo yokudumisa
esikhundleni somoya wokulahla ithemba.
Bazabizwa ngokuthi yimʼokhi yokulunga,
ehlanyelwe nguThixo
ukuba abonakalise inkazimulo yakhe.
4Bazavuselela njalo amanxiwa asendulo
bavuse lezindawo ezadilizwa kudala.
Bazavuselela amadolobho adilikayo
aleminyaka eminengi adilika.
5Abezizwe bazakwelusa imihlambi yenu;
abezizwe bazalima amasimu enu lezivini zenu.
6Lizabizwa ngokuthi abaphristi bakaThixo,
kuzathiwa liyizikhonzi zikaNkulunkulu.
Lizakudla inotho yezizwe,
lizincome ngenotho yazo.
7Esikhundleni sehlazo labo
abantu bami bazaphiwa isabelo esiphindwe kabili,
njalo esikhundleni sokuyangeka
bazathokoza ngelifa labo;
ngakho isabelo selifa labo elizweni sizaphindwa kabili,
lentokozo engapheliyo izakuba ngeyabo.
8“Ngoba mina, uThixo, ngithanda ukulunga,
ngizonda ubugebenga lobubi.
Ngobuqotho bami ngizabanika umvuzo
ngenze isivumelwano esingapheliyo labo.
9Izizukulwane zabo zizakwaziwa phakathi kwezizwe,
lenzalo yabo yaziwe phakathi kwabantu.
Bonke abababonayo bazavuma
ukuthi bangabantu ababusiswe nguThixo.”
10Ngiyathokoza kakhulu kuThixo;
umphefumulo wami uyajabula ngoNkulunkulu wami.
Ngoba ungigqokise izigqoko zokusindiswa,
wangicecisa ngezembatho zokulunga,
njengomyeni ececisa ikhanda lakhe njengomphristi,
lanjengomlobokazi ezicecise ngamatshe akhe aligugu.
11Ngoba njengomhlabathi owenza ihlumela limile,
lesivande esenza inhlanyelo ikhule,
ngokunjalo uThixo Wobukhosi uzakwenza ukulunga
lodumo kuvele phambi kwezizwe zonke.
Copyright information for
NdeBEN